مهيد كاريكا للإبداع
مرحبا بك زائرنا الكريم في منتدانا ، وندعوك للإنضمام إلينا بالتسجيل في المنتدى و بذلك تصبح عضو بيننا و منتمي إلى أسرة أحلى منتدى ، وأرجو أن يعجبك المنتدى
و بإذن الله نقدم لك ما بوسعنا ، فمعا نساهم في إرتقاء وتطوير هذا المنتدى .

مهيد كاريكا للإبداع

منتدى ( إسلامي - علمي - ثقافي - إجتماعي - ترفيهي ) يهتم بكل ماهو مفيد ، بشرط أن لا يخرج عن النص والإلتزام بالقوانين والقواعد العامة للمنتدى
 
الرئيسيةاليوميةمكتبة الصورس .و .جبحـثقائمة الاعضاءالمجموعاتالتسجيلدخول
 | 
 

 شعر سوداني حلمنتيشي ساخر

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin


عدد المساهمات: 412
تاريخ التسجيل: 13/02/2012
العمر: 26
الموقع: حاليا : مدينة بورتسودان (ثغر السودان الباسم)

مُساهمةموضوع: شعر سوداني حلمنتيشي ساخر   الجمعة يونيو 01, 2012 11:14 am





الفــلـــــــــــــــــــــــــــــــس

===============

فعلاً نحـــــن هالكنــــا الفلـــــــــــس

نحـــــــن القـــــــــرش بندســــــــو دس

و مهما يكون بعـــيد كــــــداري بنمش

حرمان علينـــــا الاسمــــــــو بـــــص

عشانا فول طرف الكشـــــــــــــــك

مو لحمه في فنـــــــــدق دلــــــــــص

وما بنمشي للـــــحلاق نــــــــــقص

حتى الشنـــب بنشيلو بى طرف المقص

ونحنــــــا لو درنــــــــــا الـــــــعرس

دي مشكلــــــه دايرالهـــــــا قـــــص

شهر العسل في (منـــــــــــــــــقلا)

و حين الدفع بنـــــــموت مغـــــص

وان كتــــرت بت الحـــــــــــــــلال

النقــــــه يرقـد قــرش و نــــــــص

يا أخــــــوانا ورونـــــــا الخـــلاص

كيــــف الخلاص من دا الفلـــــــــس

نحن الفلـــس ماصينـــا مـــــــص

------------------------------------------------------------------------------

داون داون يو اس ايه

انحنا في ايه والناس في ايه

في بغداد مارينز امريكي

و في لبنان مارينز امريكي

و في السودان مارينز امريكي

طيب ليه بنكورك ليه

ولا خلاص ادمنا صراخنا

و بقينا وطن لل سي اي ايه

و ينا الامه القال عربيه

ضد الجبهة الصهيونيه

كلو كلامنا اتلاشي اتلاشي

و اسرئيل بقت الكماشه

اسرائيل صنعت عرباتنا

و اي بلد اصبح قراشا

سقنا الدين والجيش العربي

سكناهم في النسيان

و اللاءات بلينا اوراقا

و اهديناها الامريكان

و اسرائيل حلفت بي طلاقا

جويشا تصل لي اي مكان

و الاخبار الوردت هسي

في نيويورك العرب اجتمعت

تحت رعاية ال سي اي ايه

غشو الناس و الناس استمعت

تحت رعاية ال سي اي ايه

قالو بحلو قضية العالم

تحت رعاية ال سي اي ايه

لبسو الجينز الامريكاني

تحت رعاية ال سي اي ايه

شربوا الويسكي الامريكاني

تحت رعاية ال سي اي ايه

رقصوا الديسكو الامريكاني

تحت رعاية ال سي اي ايه

تعبو خلاص ما ملو الرقصة

تحت رعاية ال سي اي ايه

قعدو القعده الامريكه

تحت رعاية ال سي اي ايه

و فتحوا الجلسه القال عربيه

تحت رعاية ال سي اي ايه

اول بند اتناقشو فيهو

تحت رعاية ال سي اي ايه

قالو نوحد نحنا الرايه

تحت رعاية ال سي اي ايه

و اسرائيل سموها دعاية

تحت رعاية ال سي اي ايه

و قالو بيوفرا لينا حماية

تحت رعاية ال سي اي ايه

و فالو كمان بيتحدوا امريكا

تحت رعاية ال سي اي ايه

و انحنا في ايه و الناس في ايه

شان ما الواحد يحرق دمو

حلو قضية الديك والحبة

و املو بطونكم لحم امريكي

و بيها شعوبكم لا تهتمو

ما الطيارة الجايين بيها

كان في الواقع امريكيه

اللبسات الراقيه الفيكم

كان في الواقع امريكيه

النضارة الداير تعميكم

كان في الواقع امريكيه

و التربيزه الفيها قعدتو

صنعه قديمه و امريكيه

الا الجثه الراقده امامكم

ياها الخيبه الياخ عربية

كان يوم اسود يوم جيتونا

لمو كلامكم ياخ اختونا

و احمو نفسكم لا تحمونا

فكو حدود الوطن العربي

خلو الشاب العربي يكاتل

خلو الطفل العربي يكاتل

خلو الشايب العربي يكاتل

خلو الدم العربي يكاتل

خلو السجم العربي يكاتل

انحا قسم ما نواليكم

و قنعانين من خيرا فيكم

كلو كلاما ادانه ادانه

و فشلت يوم لو تطلق دانه

انحنا خلاص ملينا كضبكم

و راجعين تاني علي حطين

راجعين نبني الفينا انهدا

و يطلع فينا صلاح الدين

و يمسح ظلما ياما امتدا

و نحن وراهو نقول امين

و نحن وراهو نقول امين

و ننهي حكايه السي اي ايه ,,,,

-------------------------------------------------------

طواقي الخوف قصيدة للشاعر : محمد طه القدال

==========================

ما خايف المطر

يتحاشى الضهاري الراجية قولة خيرا

ولا خايف المطر

يمشي على الصحاري تلمو في بشكيرا

ولا خايف العشم

يتناسى العشامى ونيما ياكل نيرا

ولا خايف النفس

تتذكر نفسها وتنسى يوم حِدّيرا

خوفي على البلد

الطيب جناها وقمنا في خُديرا

شاحدك يا كريم

لا تحصل خراب لا أرجى يوم ودّيرا

***

وانا ما بجيب سيرة الجنوب.

عيال بتسرح للمدارس ..

والفطور نجماً بعيد.

بنوت بتجري

على الخطاطيب الخطاطيف

البتجرح ..

والعريس نجماً بعيد.

الدكاكين التملا تفضي،

السماسرة يسمسروا،

والبسفو الطين ..

يسفوا،

والبحتّوا الراب ..

يحتّوا،

والبناطلين ليها سستم،

والقوانين ليها سستم،

البنوك الفيها بستم ..

من سويسرا ولي ماليزيا

بالسفارات

والعمارات

والخبارات .. .

انا كنت متغطي ..

ومتدفي،

العمة ملوية،

والشال على كتفي.

سودان وكان ما كان

سودان علي كيفك

السكة ساعة إيد

والأرض مروية

والناس حنان وظراف

والراح يجيك ..

للحول

والخدمة مظبوطة

مظبوطة مدنية

والدنيا حرية

الماشي درب الكار يغور

والتاب من التمباك يتوب..!

انا مابجيب سيرة الجنوب.

الغبّوا عرفوهو

والعرفو سوّوهو

والسووا بلقوهو ..

……

أصبحت زي الزول

قادل بوسط السوق

سروالو نصلوهو

لو العِرق مسروق

أو قلبي نشلوهو

طعم الكضب مسلوق

ماسخ تضوقوهو

لو فمي ما مطلوق

أو كمي غسلوهو

ياني البسوي القوق

قولي البتابوهو

ماعندكم دمي

ما عندهم دمي

من دمي لا لا لا

ماقدروا فصلوهو.



وانا ما بجيب سيرة الجنوب؟

قول استقلْ ..

انا في صفوف الزوق

واقف مع الواقفين مزنوق بهنِّيهو

ويهنوهو

أواستقال ..

ودا أول الأحزان

أو قالوا باعوهو

ودا ياهو قطِّيع القلوب

أنا ما بجيب سيرة الجنوب،

فالسيرة كمين ألف عام

لوني المحرق مندوكور

وشكلي شكلين

شكل منقة

وشكل تور

دمي المشتت من قبايل نوح وحام

شعري المقرقد زي حصايا

اتشتت فوق الدروب

كتفي المهدل بالعيوب

وانا ما بجيب سيرة الجنوب

أصل البقت

من ساس وسايس أو يسوس

ياها البقت

خلونا من حرب البسوس

الفاضلة

تكفير الذنوب

الفاضلة لمليم البشاتن

والمعاطن

والخبوب

الباقي

مايخموكا تاني على

الدفافير والكناتر والحروب



الباقي تعظيم التماسك

في الخطوب

لا نافع الشَّدة العلوق

ولا نافع المبقوص يحوق

لا بنفعك عَرَق الزنوج

ولابرقعك لبن العروب

إلا الوقوف ألفاً ضكر

واحد براك

في الشيمة تلفحك الهبوب

الغيمة تديك

للسفاسف

والعواصف

والمطر

برطع مع الأفعال

وادخل على التاريخ

يغلب أجاويدك

من قرقريب عوسك

اخرِج من التاريخ

شيخك وعربيدك

لا نافعك التكفير

ولانافعك التوبيخ

فامشيه وحيدك

وامرق على التاريخ

تلقاه في السهلات

مستني كمسيدك

لا بيظلم التاريخ

ولا يرحم التاريخ

إياهو عوس ايدك.



والأرض موقوت القنابل

في الحدود

والأرض منهبة الثعالب

والطحالب

والجيوش

باليوناميد

واليوناميس

والفُرقة بينات القبايل

والشتايم في المنصات

والشراكة الفي

المكايد

والخناجرفي الحناجر

والمنابر ..

آه من تلك المنابر،

إنداية كرتلة وبنابر

والجرايد

داقة طارات المدايد

الصَدَق في الناس كذوب

الساسة نِيّام العسل

بين انتباهة

وغفلتين

بين السلاطين والحبوش

والشلاتين

والقرايب

فين حلايب؟

واللي بنى الأرض كان في الفرض سوداني

عينيْ عليها

اتمزعت

حتة في قلبي

وحتة في غصتي .. تاني

آدي اسرائيل في النيل

بكِّيني ولعبطني

والنيل أدنداني

إحنا حبايب في الطيّبة والآه؟

آ.

غنيلي ورقصني ؟

طيب.

بسِّ سمعني آه الآه في وداني.

***

أنقد السُقا وما بينصلح وكَّايو

وانكشح اللبن ما بينفعِن بكَّايو

بعدن بى الدروب مابقصِّرِن تكَّايو

والشاكي النقاص ناقص قمح شكَّايو

***

وانا لا بجيب سيرة الجنوب

ولا أكلوني

إذا ما أكلو التور الأبيض ..

(الأرض في الجزيرة)

وبدر الله فوق سماهو

يا ساسا ياابساحوتة

مكوار حبس مياهو

عطشت قبايل ابقوتة؟

البودة في خلاهو

والأرضة في بيوتا؟

الزول رِبَت كلاهو

سمينة بي مقوتا

يا تمت المعاهو

أو خلصت الحدوتة

وانا لا بجيب سيرة الجنوب

ولا أكلوني

إذا ما أكلو التور الأبيض ..



***

يدر الله ياابسلوكة

سلوكة الجزيرة

كل يوم فينا بتنتش

سكك الحديد بي كم؟

بي كم بيت المفتش؟

والبيع بيعة عدوكا

بعت الأرض بترابا؟؟

باكر تبيع أبوكا

وان مُتْ من تُخمة باكر

ناس الشرق يبكوكا

وناس الغرب يبكوكا

ناس الشمال يبكوكا

وناس الجنوب يبكوكا.

وانا لا بجيب سيرة الجنوب

ولا أكلوني

إذا ما أكلو التور الأبيض ..

***

حمدتكم بالجاية

والجاية فوق الجاية

وعسكري الجباية

قلبو الحجر اللداية

***

بشرتكم بالسادة

والسادة بعد السادة

وجرادة فوقا جرادة

من دوكة لام كدادة

***

حمدتكم بالواقعة

والصاقعة جنب الصاقعة

مقدودة مالها راقعة

والدمعة صابة وناقعة

***

بشرتكم بالتوية

والصبنة لي الدامبوية

في الحلة دي ام كدوية

ما تقُعدوا شدرة موية

***

والأرض لا حليوة

ولاها دي الجزيرة

الأرض أمات الحنين

لو نقط الضحوي البريق،

في الحين تبتق شهوتِن.

تحبل

كما الأمات

وتشرق بالوحم

لو تسعة الميلاد بتمرق بالسنين،

أو دي الشوارع بالبنات متحينة،

ترسل تراتيل الخروج في يوم

وتقطع سرتِن.

الأرض تعريف الهديل

هدل الحمام بشري

وشوق السلام انسان

بالحيل بيعرف أنَّتِن

والأرض شافت

إلا خافت

من عيون الليل

تناجي حبيب

غريب في الليل

وتفرز غنوتِنْ.

زي بذرة في جوف الأرض

أو ضحكة عند طرف القلب

بتغني لو جات في العيون

والضحكة لاقت مرقتِن

الأرض منصوص الضمان

حضن أمك الدافي وأمين

ريحة حبيب

جاياني من شمة حبيبتي وكرفتِن

لو جاتا في يوم الهموم،

في الحين تزغرد فرحتِن.

أو حرقصت فوقها السموم،

باكر تهبهب نسمتِن.

والأرض ما بتعرف تنوم

ترتاح

وغابت جمتِن

بس تدِّي مدين للعديم

بالمدة تحفظ ذمتِن

***

هن مارقات خلاهِن

ما مارقات بَراهِن



لي بصاص حِداهِن

إو قصاص بِراهِن



هن مارقات تراهِن

تريانات تراهِن



الخوف ما حَماهِن

من شوفة حِماهِن



طمانات جناهِن

بي لبنا معاهِن



يوم الشينة جَاهِن..

مرقن ليهو جَاهِن



بالعز المبطَّر

والزوق الشَفاهِن



لا حايدات مداهِن

لا قايدات عماهِن



وما كشحن بلاهِن

فوق زولاً أباهِن



لو الضيم رماهِن

هِنْ ياهِنْ

وما هِنْ.

***



وانا لا بجيب سيرة الجنوب

لاني زول بالمرة خايف

إلا شايف

إلا شايف

إلا شايف

***



أنا شايف المطر

يتحاشى الضهاري الراجية قولة خيرا

وانا شايف المطر

يمشي على الصحاري تلمو في بشكيرا

وانا شايف العشم

يتناسى العشامى ونيما ياكل نيرا

وانا شايف النفس

تتذكر نفسها وتنسى يوم حديرا

وانا شايف البلد

الطيب جناها وقمنا في شدِّيرا





شاحدك يا كريم

لا تحصل خراب لا أرجى يوم وديرا.

----------------------------------------------------------------------

تقول لِى شنو

وتقولي لِى منو ،

-2-

أنحنَا السَّاسْ

ونَحنا الرَّاسْ

ونحن الدّنيا جبناهَا

وبَنيناها..

بِويت ..فى بِويتْ

وأسْعل جدى ترهاقَا

وخلى الفَاقة .. والقَاقا

-3-

تقول لِى شنو

وتقول لِى منو ،

-4-

تَالا أبوى .. بعنخى لَزَمْ

وتَالا اللُمْ..أَبوىْ أوْلبَابْ

وأمى مهيرة بتْ عبودْ

وأخويا المهدى ..سيد السيفْ

والخلى النصارى تقيفْ

هناك ..فى القيفْ ،

-5-

تقول لِى شنو

وتقول لِى منو ،

-6-

ونحن الشينْ

ونحن الزينْ

ونحن العقبه والعتمور

ونحن القِبله .. والقرعانْ

ونحن الشانْ

ونحن النانْ

أتينا عشانْ

نسوى الدّنيا للإنسانْ

تقول لِى شنو

وتقول لِى منو ،

-8-

ونحن الصّافى

والوَافى ،

ونحن الشّافى

والكافِى ،

ونحن الزادْ

ونحن العِينه

والزِيّنه ،

ونحن – يمين – أهالينا

أهلى سرورْ

ووكَتين ينزل المستورْ

تَرَانَه النور

-9-

تقول لِى شنو

وتقول لِى منو ،

-10-

ونحن الجبنه واللبريقْ

ونحن قداحنا سَاوات ضيقْ

ونحن بيوتنا مفتوحاتْ

مَسَاىْ .. وَصباحْ

ونحن وشُوشنا

مطروحاتْ

مَسَاىْ وصباحْ

ونحن السَمحه

والقَمحه

ونحن الطله .. واللمحه ،

ونحن الصِيدْ

ونحن العيدْ ،

-11-

تقولى لِى شنو

وتقولى لِى منو ،

-12-

ونحن عُزَازْ

ونحن حَرَازْ

ونحن هَشَابْ

ونحن قُمُوحْ

ونحن تُمُورْ

ونحن عُيُوشْ

ونحن النيلْ

وَكضَاب – يا زويل – منْ قالْ

إنّك .. تانى لينا متيلْ ،

تقولى لِى شنو

وتقولى لِى منو ،

-13-

ونحن الحَجه والتوبه ،

ونحن الهِجره .. والأوبه ،

ونحن كُتَارْ

ونحن كُبَارْ ،

ونحن – يمين – جُمَال الشيلْ

ونحن – يمين –نَضِمنا قليلْ ،

-14-

تقول لِى شنو

وتقول لِى منو ،

-15-

ونحن مِحايه

نحن طِرايه

نحن فِدايه

نحن سِمايه

نحن حجاب

ونحن اللوحْ

ونحن شَرَافه فى الدنيا

ونحن كِتاب عِلمْ مفتوحْ

على كل البُلودات ..نُورْ ،

ونحن – يمين – مَداين نورْ ،

ووشنا نورْ ،

-16-

تقول لِى شنو

وتقول لِى منو ،

-17-

ونحن الحِنه والجرتقْ

ونحن الزفه والسيره ،

ونحن ..أبشرى والشبال ،

ونحن السَىْ

ونحن الوَىْ

ونحن الرقبه .. والتُمْ تُمْ

ونحن اللَمْ ..

يكون فى الدنيا ..متلنا ..لمْ

-18-

تقولى لِى شنو

وتقول لِى منو ،

-19-

ونحن العَاجْ

ونحن الصَاجْ

ونحن البوشْ

ونحن الحوشْ

ونحن الناسْ

وكتين الديارا ..يباس

وإن درت العديل والزين

تعال يا زول ،

وإن كست الكعب والشين

أرح .. يا زول

-20-

تقولى لى شنو

وتقول لى منو ،

-21-

ونحن السورْ

ونحن الحُورْ ،

ونحن بناتنا محروساتْ

ونحن وِلادنا ضُلالاتْ

ونحن أُماتنا ياهِنْ ..ديلْ ،

وجِيب ورينى زيىِّ منو ،

وتقول لِى شنو

وتقول لِى منو ،

-22-

ونحن فَزَعْ

ونحن وجَعْ

ونحن اليُمه ..واليَابَا

ونحن أريتو بالتَابَه ،

ونحن – يمين – إذا حَرّتْ ،

نخلى الواطه ..رُقَابه ،

-23-

تقولى لِى شنو

وتقولى لِى منو ،

-24-

ونحن زَغَاوه والعطرونْ

ونحن الدُونَا ..مافيشُ دونُ

ونحن وِلاد مَلك خِرتيتْ

وسَابَ الجرْ

وحجَر السِكه ،

والتاكا ،

وسيّدنا الفى الجبل ..دَاكَا

ونحن – يمين – نضِمنا كُتُرْ

وشيَتنا كُتُرْ

وأسعَل ناس كَرن والطُورْ ،

وأسعَل كَررى .. والعَتْمُورْ

وأسعل – يا جنَاَ – الخرتُومْ ،

وشوف كيفن زعلنا كُتُرْ ،

وشوف كيفن فرحنا كُتُرْ ،

أنحنا الـ للرجال خُوسَه ،

ونحن –يمين – جِنَات موسى ،

-25-

تقولى لِى شنو
وتقول لِى منو ،

-26-

ونحن الدوكه

والضُلاله ، والدونكه ،

ونحن الدانقه ،

والراكوبه ، والواطه ،

ونحن الفَكَه

والشِبكَه

ونحن الحجزه .. والعكَه ،

ونحن الجُودْ ،

ونحن أسودْ ،

ونحن النَانْ ،

حديثنا إذا أرِدتو رُطَانْ

وحين دايرين ..نسوى بَيَانْ ،

-27-

تقول لِى شنو

وتقول لِى منو ،

-28-

ونحن الخَلوهَ والدايره ،

ونحن تَكيه العايره ،

ونحن الضُّلْ ،

ونحن الكُلْ ،

ونحن سبيل غريب الليلْ ،

ونحن صباح مسافر الليلْ ،

ونحن فَنَاجرةَ الدّنيا ،

ونحن حَبَابْ

حديثنا حَبَابْ

تعال شَرِف .. وشوفنى منو ،

وتقولِى شنو ،

وتقولِى منو ،

-29-

أقيف لِسَعْ

وأقيف وأسمعْ ،

ونحن صديرى منضوم ويلْ

ونحن القَرمصيص ..بلحيلْ ،

ونحن التوبْ

ونحن الووبْ

وناس حبوبْ

وناس حَرّمْ

ونحن إذا رأينا كبيرْ

نقيف طولنا ..ونقولْ لُه ..حَبَابْ

ونديه البُكَان ..ترحابْ

ونحن. اليَانَا ديل .. يا زولْ

وتسعلنى .. وتقول لِى منو

وتقولِى شنو ،

-30-

أقيف لسعْ

وأقيف .. وأسمعْ

ونحن التَايَهْ

والاندايَهْ

والزِريعهْ

والعيزومهْ

واتفضلْ ،

ونحن الرايَه مرفُوعه

ونحن الكُلفَه مرفُوعه

ونحن حلفتَ … مدفوعه

-31-

تقول لِى شنو

وتقول لِى منو ،

-32-

وأما عجيبْ

وأما غريبْ ،

وأقيف لسعْ

وأقيف .. وأسمعْ ،

-33-

أنا الكَعَب البسوى الويلْ

وأنا الزول السَمِحْ ..بلحيل ،

وداير ..منَِّهُمْ .. يَاتُو ..،

تقولى لِى شنو

وتقول لِى منو

------------------------------------------------------------





الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://muhaiedseedebdaa3.sudanforums.net
Admin
Admin


عدد المساهمات: 412
تاريخ التسجيل: 13/02/2012
العمر: 26
الموقع: حاليا : مدينة بورتسودان (ثغر السودان الباسم)

مُساهمةموضوع: رد: شعر سوداني حلمنتيشي ساخر   السبت يونيو 02, 2012 5:50 pm




تم أخذ الموضوع من مواقع مختلفة على الإنترنت ..



الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://muhaiedseedebdaa3.sudanforums.net
 

شعر سوداني حلمنتيشي ساخر

استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

 مواضيع مماثلة

-
» شعر سوداني في الشواكيش

صلاحيات هذا المنتدى:لاتستطيع الرد على المواضيع في هذا المنتدى
مهيد كاريكا للإبداع  :: منتدى الشعر والشعراء :: قسم الشعر الحلمنتيش-