مهيد كاريكا للإبداع
مرحبا بك زائرنا الكريم في منتدانا ، وندعوك للإنضمام إلينا بالتسجيل في المنتدى و بذلك تصبح عضو بيننا و منتمي إلى أسرة أحلى منتدى ، وأرجو أن يعجبك المنتدى
و بإذن الله نقدم لك ما بوسعنا ، فمعا نساهم في إرتقاء وتطوير هذا المنتدى .
مهيد كاريكا للإبداع
مرحبا بك زائرنا الكريم في منتدانا ، وندعوك للإنضمام إلينا بالتسجيل في المنتدى و بذلك تصبح عضو بيننا و منتمي إلى أسرة أحلى منتدى ، وأرجو أن يعجبك المنتدى
و بإذن الله نقدم لك ما بوسعنا ، فمعا نساهم في إرتقاء وتطوير هذا المنتدى .
مهيد كاريكا للإبداع
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

مهيد كاريكا للإبداع

منتدى ( إسلامي - علمي - ثقافي - إجتماعي - ترفيهي ) يهتم بكل ماهو مفيد ، بشرط أن لا يخرج عن النص والإلتزام بالقوانين والقواعد العامة للمنتدى
 
الرئيسيةأحدث الصورالتسجيلدخول

 

 بت من ورق - للشاعر الرائع/ أحمد الريح العليش

اذهب الى الأسفل 
كاتب الموضوعرسالة
Admin
Admin
Admin


المساهمات : 412
تاريخ التسجيل : 13/02/2012
العمر : 36
الموقع : حاليا : مدينة بورتسودان (ثغر السودان الباسم)

بت من ورق - للشاعر الرائع/ أحمد الريح العليش Empty
مُساهمةموضوع: بت من ورق - للشاعر الرائع/ أحمد الريح العليش   بت من ورق - للشاعر الرائع/ أحمد الريح العليش Emptyالأربعاء فبراير 22, 2012 1:04 pm




بت من ورق :
========

هوي يا الحبيب أحسن عيونك فتحن

ونفض غبار الجامعات الكتحن

عبرات هواي لو سدسدن حلقك دحن

لي زول سواي ما تنحنحهن

وأنا أصلي عارفك ما بتحن

ليه العوينات البريدنك تخونن وتجرحن

ليه بالدموع والنوح مع الناس تفضحن

و أنا ديمة بسال ربي انو الطالبات يسمحهن

ويفرحهن و بالخير تملي يصبحهن

ولو في مشهيهن لكلكة يصلحن

بس لو ظهر كاشف رقم لا يصافحن لا ينجحن

آي لو ظهر كاشف رقم لا يصافحن لا ينجحن

هو شنو الفضل في الدنيا شان الناس تذاكر وتمتحن

بس نبرا من عيشة الفقر

نبرا من عيشة الفقر

وسمح السكات ألفي خشم سيدو

وكمان سمح الصبر

مادام في مدرسة مدرسة

وأساتذة خصيصين نجاح

و حصص صباح ودرس عصر

حنسوي أيه حندق جرس آخر فصل

أو ننفصل نتلم نشوف باقي العمر

ما واضحة زى عين الشمس

واضحة كان هسه وأمس

واصلي مارق يا ضنا

من غُنوتي الأنا مُدّمنِا

من بلوتي وسلواي أنا

من قصة لا بتأكلنا عيش لا تفر جبين هذا العناء

من شدة فاردة الارتخاء ومتمكنة

من ممكنة وما ممكنة

و إيه لزوم يعني القصيد وكتين تموت العاطفة

وكتين نعتم فكرتو و حروفو زاتا نلونا

وكتين نغتغت مهجتو وندِس عيونو وندفنا

إيه لزوم يعني الشعر ألما عرف معناهُ ولا شهد العناء

أبقى مارق يا جنا

كان من هناك أو من هنا

كان منهم أو مننا

من مزامير التوجس والغنا

من صباحات الهواجس

ومن طوابير المدارس

ومن مروق الروح

وامرق من متاهات النفس

ما واضحة زى عين الشمس

واضحة في كل الجرايد

والقصائد

والمعابد

والمصانع

والشوارع

لما دون نشعر نحس

ولما دون خاطر يمر

واضحة انو سكاتو مقدود من دبر

وكلامو مقدود من دبر

وضميرو مقدود من دبر

وقميصو مقدود من دبر

لكن منو البشهد عليك يا بت مادام كلك عذر

يا بت مادام عرفوك جد بتخافي

من ضل الضحى ومن بشرة الناس السمر

ويؤسفنا جدا إننا يؤسفنا اسود مننا

ومحنية ضهرو من الكبُر

وعرفوك جد بتخافي من ضل الضحى

ومن ضحكة الناس السمر

عرفوك ، بس هم ما أظن فهموا العيون

السمحة فيك كانت شتر

ويسلم ضراع الطين

وقدح المونه

جيتّ أمونه

حر الواطة واقدة صحونا

للولد البشيل طوريتو سباق الفجر

وتضيع سنين العمر ليه في المدرسة

المدرسة ألما بتجبر الخاطر إذن

المدرسة ألما بتستر الحال بكرة

ما بتملالنا فد شوال تمر

ياخ إيه لزوم يعني الدفاتر

والمحابر

و الشنط

والأردية

والدق

ودرس اليوم

وحلق الرأس

و قليم الضفر

إيييييييييه يا سنين المدرسة

فدتينا إيه يا مدرسة

دي الجامعة لسه فيها ناس

بتحب بعض

وتلبس بعض

وتاكل بعض

وتقوم بعض

وتقعد بعض

وتـ........................

منو العوض وليهو العوض !

وفي ناس كمان تجمع ورق فاضي وتمر

تنجح فشل تسرق حصاد غيرها وتمر

وكتيـــــــــــــــــــــــــر في ناس بتفط سطر

**********

ياشعب أصحا

كفاك شقا

وكفاك خطاك على الجمر

لمتين حنحلم بالغناء

لمتين نعدي من الضياع

والفرقة والحرقة

ونمــــــر

وسمح السكات ألــفي خشُمْ

سيدو وكمان سمح الصبر

والدنيا مازالت بخيــــــر

والدنيا مازالت فقر

***************

وأنا زى دراويش العشق

ما سقت خطوات الرحيل

لكن مشيتا وبالجبُر

لكن مشيتا وفوق جمُر

و حبيبتي قالت لي تعال

ومرقت من جلدي القديم

و درعّت توب الصبينة ومشيتلها

وأنا منتهي

سنتيــــــــــــــــــــــــن

ولا قعدت عيوني مع عيونا إتونست

لا في الخيال لاقيتا

لا لاقتني هي

سنتيـــــــــــــــــــــــــن

ولا بنبدالنا سكة

ولا خطانا بتنتهي

سنتيــــــــــــــــــــــــن

ورغم الابتعاد

و العشنا من خوف وإرتعاد

لســع سعاد هي بتستحي

وأنا بشتهي

وأنا بستحي وهي بتشتهي

***********

ومابين نعم و اللقيا

كان حرفين نهي

وأنا خاطري من كتر الهموم

الساعة خمسة نسى

وســــــهي

وفي الهم غرق

وبالشوق حرق

وحبيبتي قالت لي تعال

خافت وكت قتليها شيخ

مسكينة ما عارفة الفرق

بين الدراويش والشيوخ

بين الصفيقات والعرق

بين الغرق و ألما غرق

تاريها زيي أنا يا خلق

طينة ومطينة بالعشق

ومكتولة لي حد السكات

و مُتيمة

مُتيمة

بس كنت ديمة بعلِما

انو الحزن زاد الفرح

والفرحة نفسها مؤلمة

والعافية اسمح منها

لو حتى كانت بلسما

والشمس في توب من حلال

و القمره اكبر مجرمة

وكضابة ما بتحلب لبن

القمره ما بتحلب لبن

و مليانة زيف و مهضلما

ممسوخة مهما إتبرجت

ما زى مصابيح السما

والقدرة ما بتنفات شبر

والسترة ميها الكمكمة

و الناس سواسية كالمشط

والحرة دينا مِلجِما

و الحلوة مي حلوة طعم

و المرة ربنا قاسما

والقسمة ما بالأيد كمان

الأيد هي زاتا مقسمة

أصبع صغير

و أصبع كبير

و أصبع وسط

و أصبع نضِم

و أصبع بدخل خاتما

وتفرق بداية الشوق كتير

وكتين تصل للخاتمة

ما الريدة بتشوف بي تحت

والحب موشح بالعمى

وما بفهم النور

إلا زول عاش في دياجِر مظلمة

النجمة ما بتعني الوضوح

العتمة مِيها الهضلمة

الوشمة ما نزف الجروح

والبسمة عزّ البِفهما

ما النسمة في الصيف لو تفوح

تحرق حشا البتنسما

و الوجعة باآآردة علي البِبوح

وتسِل رِويحّة البِكتُما

و الروح بتمرق ما بتموت

و الجتة بتقيم مأتما

ونحن انعكاسات للنجوم

والواطة ضل راميا السما

وأنا مارميت إذا رميت

وأي عاشق ما رمى

وضحك المشيب برأسه

فبكى ونادى سلما

وسْمت بُقات الطيرِ

حين كبا حزينا مرغما

وريتا معنى القارعة و عقروا

وربك دمدما

حفظتها الناس

و الفلق

و الحمدو

و الإخلاص

و طه

ولم يكن

والعاديات

وكأنما ......

ما كان في شي ...

وبعد دا كلو بتنتشي

لا بتستحي و لا بتختشي

و قرمت كرعيّ بالمشي

وكلمتها قتليها أوعى تدقشي

الطِيبة ما في كلُ شي

وما تهبشي ألجوه خليهُ جوه فيك

وألما بخش ما تخشيشي

ودمع الظنون البيني بينك

قشقشي

والشوق علي باب ألبريدك

وشوشي

نار النضال جنب الشمس

ما تمشي بي راحتك عليها يا روحي

هوي بتشمسي

كان جاك خريف الوجعة

سويلِكِ بيوتْ

في داخلي ابني وعشعشي

أديني إحساس إني شئ

و قرمت كرعيّ بالمشي

كلمتها خلي بالك يا بنية

العمارات البناطحن والمعاني القُرمزية

أوعى تسرق من ملامحك

أو تغير فيك شويه

ماني شايل هم قرايتك

أنتي قراية وذكية

ابقي جد يا حلوة فاهمة

وابقي واعية وكوني حية

اصلو في الجامعة العريضة

وفي بيوت الداخلية

في الحبايب وفي القرايب

وفي البقاسموك الازية

إلا برضو خلي بالك

هي المصايب مي شويه

العقارب و الكهارب و الدبايب

والمصايب

وألف سوسة و ألف حية

و إنتِ سمحة إنتِ قمحه ولسه نيه

ولو دقستي

اسأليني أنا الدقستا

وأكلوني السِمسِمية

في زمننا وحات عيونك

بِدفِنُوكْ يا زوله حية

ابقي واظبي على صلاتك

قومي كل ما نادى حيّ

وخلي بالك في الشوارع

والمسافات القصية

وفي مشاوير العصاري

وأنت ساعة المغربية

وفي الحدائق والكباري

والملاهي الأجنبية

والوليدات الأخيّر ليك

من تصاحبيهم بنية

و البنيات البظلتن وشهن

و البتعمل فيها شيخه

أو تقول بتشوفلا طية

وفي القراية سجم رمادن

ابقي مارقة و ناغمي ليا

ومرة تلقى الشدة مدة

وعادي تلقا الخمسة مية

واسمع اسمع ياما تسمع

في البغِنن

الله ليا

وُكُر عليا

وجيبوا ليا

و.................

عاد دا كلام دا

ونحن يا حليلنا الغلابة

بلعبن بنا كوعليه

ودايره بيرقر ودايره

شية و دايره طرحة

و تيك و ملحة

و دايره جسط

و ميج ومسحة

وخصلة تايهه

وشنطة بطة

وعمو أسرع انقبضتا

و زولي نطا

ودي المحطة

وهنا لقطة

وهنا .......

و هيه يا أنت

و هيه و هيه

و تاني هيه

عندكم كلب ولا أجي بالدرب

اطفر ولا بتدفر

الماف شنو

أبوك لا راضي لا راضي

كيسك فاضي ولا نمشي القاضي

اشخت شخيت و .....

وفي النهاية القصة فكه

دي الحضارة الدينا فكا

ولاحقة حبوبه أمي مكة

وعاملة فيها رشيقة حية

ومهما نصرخ هي هي

وفي البتنسا أبوها يقدح

في ضنا ايامو الشقية

شان هي تقرا و بكرة تنجح

وتحيا مستورة و رضية

وفي الحليل اماتن يبكن بي

وراهن ووب وحيّ

إلا هن سجم المحنة

حليل زمنكن يا رضية

لا فؤادِنْ مرة حن

لا طرن بالمرة جية

الشفايف ما شفايف

والشعر سونلو كية

وبدن الإسكيرت شرطة

وتاني فوق الركبة طية

وبمرقن .....

أحسن اسكت !

وشدي حيلك يا بنية

شدي حيلك يا بنية .


$$$$$ مـ][ـهـ][ـيـ][ــ][ـد سـ][ـيـ][ــ][ـدآ $$$$$


بت من ورق - للشاعر الرائع/ أحمد الريح العليش 154



بت من ورق - للشاعر الرائع/ أحمد الريح العليش 402510_307510532646057_712337894_n






عدل سابقا من قبل Admin في الجمعة يوليو 06, 2012 9:12 am عدل 1 مرات
الرجوع الى أعلى الصفحة اذهب الى الأسفل
https://muhaiedseedebdaa3.sudanforums.net
Admin
Admin
Admin


المساهمات : 412
تاريخ التسجيل : 13/02/2012
العمر : 36
الموقع : حاليا : مدينة بورتسودان (ثغر السودان الباسم)

بت من ورق - للشاعر الرائع/ أحمد الريح العليش Empty
مُساهمةموضوع: رد: بت من ورق - للشاعر الرائع/ أحمد الريح العليش   بت من ورق - للشاعر الرائع/ أحمد الريح العليش Emptyالجمعة مارس 02, 2012 6:08 am



لتحميل القصيدة في شكل مقطع صوتي إذهبوا إلى منتديات المعيلق .


الرجوع الى أعلى الصفحة اذهب الى الأسفل
https://muhaiedseedebdaa3.sudanforums.net
 
بت من ورق - للشاعر الرائع/ أحمد الريح العليش
الرجوع الى أعلى الصفحة 
صفحة 1 من اصل 1
 مواضيع مماثلة
-
» قصيدة الزحزحة للشاعر الرائع / أحمد الريح العليش
» قصائد للشاعر : مأمون بكري هلال
» الثقافة الإسلامية - للشيخ / أحمد حسن
» ديوان زهور الربيع للشاعر صاحب المنتدى

صلاحيات هذا المنتدى:لاتستطيع الرد على المواضيع في هذا المنتدى
مهيد كاريكا للإبداع  :: منتدى الشعر والشعراء :: قسم الشعر الحلمنتيش-
انتقل الى: