مهيد كاريكا للإبداع
مرحبا بك زائرنا الكريم في منتدانا ، وندعوك للإنضمام إلينا بالتسجيل في المنتدى و بذلك تصبح عضو بيننا و منتمي إلى أسرة أحلى منتدى ، وأرجو أن يعجبك المنتدى
و بإذن الله نقدم لك ما بوسعنا ، فمعا نساهم في إرتقاء وتطوير هذا المنتدى .

مهيد كاريكا للإبداع

منتدى ( إسلامي - علمي - ثقافي - إجتماعي - ترفيهي ) يهتم بكل ماهو مفيد ، بشرط أن لا يخرج عن النص والإلتزام بالقوانين والقواعد العامة للمنتدى
 
الرئيسيةاليوميةمكتبة الصورس .و .جبحـثقائمة الاعضاءالمجموعاتالتسجيلدخول

إرسال موضوع جديد   إرسال مساهمة في موضوعشاطر | 
 

 الردود على قصيدة أنا بكرهك - رائعة نضال حسن

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Admin
Admin


عدد المساهمات : 412
تاريخ التسجيل : 13/02/2012
العمر : 29
الموقع : حاليا : مدينة بورتسودان (ثغر السودان الباسم)

مُساهمةموضوع: الردود على قصيدة أنا بكرهك - رائعة نضال حسن   السبت مايو 26, 2012 8:50 pm




قصيدة الشاعرة الرقيقة الرائعة نضال حسن الحاج (أنا بكرهك)

من القصائد الشبابية الجميلة والقوية وبأنامل أنثى كان لها حضور

وتأثير قوي على محبي القوافي وعلى الشعراء أيضاء

ولهذا كان لها ردود أفعال كتابية من العديد من الناس ونقد إيجابي

وآراء تنتفى وجود مقدار هذا الإحساس المترف المضاد للحب

وخاصة من قبل الشعراء



نضال حسن الحاج:

بس بكرهك..!

انا بكره اليوم الصنع قلبا يكورك ويندهك

انا بكره الوطن البلم شرف الغرام المنتهك

من ياتو باب طليت علي ما كنت اصلا بشبهك

انا بكرهك

انا شلت ريدك في القليب وسقيتو من دم العروق

صنقعت دليت النجم دنقرت كبيت نور وشوق

وعصرت موية الانتظار ختيتا في وجع الحروق

وكان النتيجة تبيع هوي هو اريتو كان سويتلو سوق

انا بكرهك

من وين اجيب ليك الدموع

من وين اصنقر حيل كلام كان امنيات قلبو الرجوع

من وين اذا هتك الضلام حيل خيلي القالك شموع

لكني مجبور اطردك واقفل وراك باب الضلوع

شديت رحالاتي ومشيت وكتين هتك حيلك هواي

ارتحت في موجي ورسيت

لا حرك الموج البحر

لا صد فلبي ولا قسيت لكن طلعت خيال عشم

ضمخ رؤى الوجع المميت

انا بكرهك

قدر اشتهاي

انا بكرهك

قدر الغرام الكان زمان كابت مساماتي وهواي

انا بكرهك

قدر اني ما لودت بيك كريات شراييني ودماي

انا بكرهك

قدر اني غنيتك غناي

من وين دخلت علي مدن شاخت من الوجع الاليم

من وين طرقت جدار قلب لقح هوى العشق العقيم

من وين سخت شمسك علي

كانت سماي مليانة غيم

فتق جراحــاتي

فتق جراحاتي وامش

خليني في لهب الجحيم

انا قلت ليك..

انا بكرهك

قدر المواسم الشادة خيل الريد عليك

انا بكرهك

قدر المصائب الحارسة بوابات مجيك

انا بكرهك

نفس المساحة وحجم قلبي الكان تملي بيشتهيك

بقى بكرهك

واتوكل ارحل مني فوت

حرمان علي قلبي الكلام

كان غيرك اجتاحو السكوت

خليهو قلبي الاندفن

تنسج عليه العنكبوت

اوخلي.... من بعدك يموت

الموت اخير......

من اني افضل

في رحابك وفي رجاك

انا كنت لو غاب القمر دائما بضوي

ضلام دناك

وانا كنت لو غيمك رحل

بطلع عشان اسكن سماك

وانا كنت لو بردك نزل

بوقد صوابعي لهب حداك

لكن منو القدر كدا

والله لو انا في محلك

بنسج الشمس احترام

واهديها ليك متمددة

بفتح كراريس الكلام

اختار حروفي واجردا

بنبش قبور المستحيل

كلمات شكر متفردا

لكن خسارة على قلب

حباك بلا ما يعرفك

انعل ابو القلم العلي دفتر غناك دمو انسفك

انعل ابو الشعر الغشاني وغنى فيك والفك

منعول غناي

منعول غناي كان ما امتطيت خيلي وبقيت اتاسفك

بتاسفك وكتين عيوني بسوقن الشوق لي انتظارك

لما ليلي يسوق محاسنو وينهزم عندك نهارك

لما ابكي انهزامي عشان ابارك انتصارك

لما كوكبي ساب مدارو رحل عشان يسكن مدارك

كنت مالي زمان ومالك

لكن وحاتك بكرهك

ندمان

ندمان على عمرا معاك ضيعتو

ضيعتو في غفلة زمن

ندمان علي

دمعا سكبتو على رضاك بلا تمن

انا كنت بحلم في وجودك ينكسر خاطر الشجن

لكن رضاي عليك عشم ابليس قصاد جنة عدن

انا بكرهك

كلما يطول ليلي ويواتيه العذاب

انا بكرهك

كل ما القلم يركب مصاعب الدنيا

يمشي على الكتاب

انا بكرهك

كل ما الفراق كتل مضامين العشق سدالو باب

انا بكرهك

قدر العيون ما تلبس التوب الزراق

تتوضأ موية الانتحاب

انا بكرهك

من كل باب انا بكرهك

واتوكل ارحل من جواي

غلطان اذا قلبك هداك قال ليك حا تفضل غناي

غلطان اذا عقلك رضخ لي ظن يقول انك حداي

والله ما فارق معاي

انا كنت ناوي اجملك

بس كنت ناوي اجملك

وامسك مضامين اللغات

من فيض حروفي اكملك

ترحل علي درب العشم

بي زاد هواي احملك

وكتين اخش قلبك جرا

واقطع قليبي وادملك

ندمان منو

انا غايتو ما ندمان عليك

اتوكل ارحل من جواي عيش العذاب الباقي فيك

ولو قلبك اتجرأ رجع

حقك تلومو علي مجيك

شان قلبي انت مليتو دم

ياخ فلبي انت مليتو دم

ما عادلو باقي يسبو ليك

على كل حال

انا بكرهك

عدد الحصى وعدد الرمال

انا بكرهك

عدد الصواب والاحتمال

انا بكرهك

عدد الحقائق والخيال

انا بكرهك

عد الشنة وعدد الجمال

انا بكرهك

عدد الاجابات والسؤال

انا ابكرهك

عدد الشعر ماسنة سيف الارتجال

انا بكرهك

عدد اللي ممكن والمحال

انا بكرهك

عد ما زمان قت ليك تعال

انا بكرهك

مستورة حالي وراك وفوت

يا دابو ليلك همو طال

مستورة حالي وراك وفوت

يا دابو ليلك همو طال

على كل حال

انا بكرهك

..............................................


بكره معاك .. (محاولة للرد على أنا بكرهك لنضال الحاج) **

:: بكره معاك ::


أيوة أكرهي ...

أيوة أكرهي الزمن الرماك

في الريدة لما القلب هام فيهو وسكر

أيوة أكرهي القلب النزف

من بعدو في حزنو إنهمر

روح ودر من بعد ما كان زي زهر

دايماً مفرهد ومزدهر

أيوة أكرهي الزول النكر

عشقاً خرافي وما عرف

جواكي أغلى من الدرر

أيوة أكرهي ....

قدر السنين العاشها قلبك

قبل ما تغشاه الجراح

والبعدها الضلّت خطاوي الريدة بيك

وقلبك الأهديتي ليهو وهسي راح

قدر القليب النام جواكي رقد أحلام فرح

ومن غير سببب أصبح يصحي جواكي من ليله أشباح

وخلى القليب لا نام ولا بعدو إستراح

بس إنتي لازم تكرهي

قدر العذابات والنزيف

وحروفك الصبحت بتلبس للألم أندر وشاح

يا غالية لازم تكرهي

وقدر البنيات اللكانوا

بريدوا من حواء الزمان

والريد ودر

وما زالوا بسبحوا في بحور الريدة

تايهين على بر الآمان

ولمن تقوم الساعة

ويقولو المسيح الليلة لاح

بس إنتي لازم تكرهي

لمن ينوسر جرحك الببكي الدواخل

ويسيبها ضاجة من النواح

من تاني لازم تكرهي

لمن بينتر قلبك في كل ليل

وفي كل صباح بيطل عليهو

كيف ما بتلومي وتكرهي

أيوة أكرهي الزول اللقال

بهواك وما قدر هواك

أعياك وللهجر إستباح

قدر الليالي الكان زمان

في الريدة ديمة منورة

والتانية ....

لمن طال سوادها جفا الصباح


أيوة أكرهي ....

رغم إنو إحساسك جميل

ما بشبه الكره العليهو ظهر وشاع

في أعلى أفق الغافية لاح

قدر القليب الكان بريد

والليلة ما سوالو سوق

باعوهو بي ثمناً زهيد

بس أكرهي ...

قدر الفرح في كل قليب

وقلبك وقلب كل البريد

والليلة غرقان في الحزن

في ريدو ما طلاهو عيد

بس أكرهي ...

قدر الغرام العاشوه

من زمن الحجر الكان بعيد

وما زال بعيش زاهد

إلى أزل العمر

رضيان ومن دون أي أمر

ومن ريد فريد

ممكن عشان الريدة يفنى

يموت شهيد

قدر الغرام الكان شديد

المات زمان

والعاش وتوج بالجديد

بس أكرهي

أيوة أكرهي ...

أيوة أندمي ...

وديمة أندبي اليوم الدخل

بابك وكان ما بشبهك

أيوة أندمي ...

وزيدي الندم قلباً هواك

ورماكي ما قيّم صفاك

والما بعرفك بجهلك


أيوة أكرهي .. القلب الغَدََر

وباكر حيندم يندهك

لمن يشوف ....

كيف كان نضالك في هواك

لمّن يقدر كيف علاك

لمن يفتش في الخلوق

ويلقى الخصال فيك يا ملاك

وإنو السعادة ....

أكيد تعاسة .. دروب هلاك

لمن تكون مع زول سواك

ويرتاد صحاري المستحيل

في سكتك شان يوجدك

وما بيوصلك ...

ويلبس من الندم الليالي يتوه هناك

مديتي إيدك للسما وجبتي النجوم

ردَ النجوم سهماًَ طعن

شهباً خرق قلبك حرق جوفك

عليهو زاد الهموم

لقّيتي كفك للسحاب راجية الغيوم

نزلت علي قلباً يباب

ردّاها سيل جرف الخضار

شايل مع التيار سموم

طوّقتي كونه بحور حنين

بالشوق عذب منبع

ومن الريد معين

خلاها غرقت القليب الهام سنين

والكان أمين قايله بيدوم .. أصبح ضنين

راح سابو في لجج الدموم


على العموم ....

لازم تردي الريد كره

لازم تلومي وتكرهي

وبابك كمان أقفلى جد

أقفلي تب ما تفتحي

باباً زمان دخّل

عليكي رياح عذاب

لكنو بس ....

خليه موارب لي سواه

ما تسدي لي كل ريدة باب

يمكن يجي اليوم البتتزال

كل غشاوة وكل ضباب

يمكن يجي الزمن

البيطرد كل سراب

رغم إنو زمن الريد

خلاص شايفنو غاب

رغم إنو في الريد إغتراب

رغم إنو عشم الريدة خاب

رغم إنو ريدك يا ملاك

كان ريدة في

زمناً غلط زمناً خراب

رغم إنو طعم الريدة

عرفوها الزمان

عاشوها في زمن الشباب

شالوها أجمل أمنيات

حفظوها حتى وهم شياب

نثروها عبر الأغنيات

والليلة بس ......

نقراها عنوان لي ديوان

أو حتى في صفحات كتاب

يا ريتو زمناً عاشوا فيه

يا ريتو لو كان تاني آب

وعلى العموم .. رغم الهموم

رغم السموم

رغم العذاب والإكتئاب

وبي كل ألم

جاك وإحتواك

من حقك إنك تكرهي

ومن حقي أنا

وحق كل عاشق

ريدو شاك

إنتى أكرهي

أيوة أكرهي

يا غالية للريد أكرهي

وبكره معاك


---------------------------------

كان هنالك رد قوي من شاعر كسلا ** د . كمال شرف

والذي كان ضيفاً في حلقة خاصة قدمها الإذاعي الراقي جداً

الأستاذ / عمر محي الدين

بعنوان (أنا بعشقك)


النص :


أنا بعشقك ...

يا ريتني لو شفتك زمان

من قبل ما كت بعشقك

ويا ريتو لو كان الزمان كان بعرفك

من قبل ما يرميني يوم في سكتك

ويا ريتو لو كان الأمل بعرف كمان

إنو الزمان مرهون وصال من فكرتك

بي كل فال من ذكرتك .. أنا بعشقك

أنا بعشق القلم البلون للجمال في لوحتك

وأنا بعشق الولع البجيني من جمالك وهيبتك

وأنا بعشق الوجع البزيد كل ما تزيد في جفوتك

أنا بعشقك ...

وما بهمني ..

ما بهمني مر الكلام القالوه فيك .. الما بطولك يلحقك

والبسمة جواي في فرح لمن يجيبو ذكرتك .. أنا بعشقك

والنظرة منك يا هواي لمن أكون جنبك براي

أضحك معاك أونسك

أنا بعشقك ...

لو خيروني أعيش أموت بختار أموت

وأنا ميتة فيكَ ومن زمان من يوم عرفتك بعشقك

أنا بعشق الحرف النظمته عليك حنين وأنا في رجاك .. أنا بعشقك

وأنا الغربة اللطالت بالسنين يا ريتها لو كانت معاك .. أنا بعشقك

لو قالوا عن وجهك قمر زادوهو نور .. وكسوهو در

وكتبوا عليه محظور على كل البشر

أنا مستحيل أقدر أسيبك أتركك

أنا بعشقك ...

أنا بعشقك في بسمتك .. في ضحكتك .. في نظرتك

في ريحة العطر البفوح من بدلتك .. أنا بعشقك

قدر المسافة البينى بينك .. سكة البين والخصام

أنا بعشقك ...

قدر الدموع لمن تسيل تنزل علي خدي وتنام

أنا بعشقك ...

قدر البيوت الفي المدن مليانة بالحب والوئام

أنا بعشقك ...

قدر الشجر وأوراقه في زمن الخريف لمن تفرهد تزدهر فيإنسجام

انا بعشقك ...

عدد الحروف الشايلة إسمك تفتخر .. انا بعشقك

عدد الشعر وأبياته فيك القلتها بين المطر بين الغمام .. أنا بعشقك

عدد الزهور لمن بتحضن للفراشات والطيور في إبتسام

أنا بعشقك ...

عدد النجوم وأنوارها في عز الشتاء لمن تقيف في إنتظام

أنا بعشقك...

عدد النجوم والليل طويل مهما يطول أنا ما بعير ليهو إهتمام

أنا بعشقك ...

يا ريتنى لو صادفت زول يسألنى ليه أنا بعشقك

كان الجواب ما شفت زول في الدنيا زيك في الخصال في عفتك

أنا بعشقك ...

وما شفت في الزمن القبيل واحد جميل في هيبتك

حتى العوازل قالوا فيك ما ليك مثيل في معدنك

أنا بعشقك ...

والذكرى تحكي والخيال عن قصة النيل والنخيل

والأصالة الساكنة جواك يا جميل وبتشبهك .. أنا بعشقك

أنا كنت فاكر الريد كلام فيهو الخصام فيهو الوئام

أنا بعشقك ...

لكن عرفت الريد معاك فيهو الأدب والإلتزام

أنا بعشقك ...

وعشقت فيك صمتك كمان ولقيتو أحلى من الكلام

وأنا بعشقك ...

إحساسي بيك إحساس فريد

سميته ريد ولقيته فوق الريد يزيد

وانا بعشقك ...

سميته خوف ولقيته جوة الجوف شديد

أنا بعشقك ...

سميته حب ولقيته في طبعه عنيد

وأنا بعشقك ...

من الوريد حتى الوريد أنا بعشقك

من يوم رسمتك في الورود وأنا بعشقك

من يوم عرفتك زي بحر ما ليه حدود أنا بعشقك

من قبل ما أصبح وليد وأنا بعشقك

ومن قبل ما تبقالي سيد أنا بعشقك

ومن قبل ما أرحل بعيد وأمشي معاك مشوار جديد

أنا بعشقك ...

ومن بعد ما يختوا علي قبري الجريد .. أنا بعشقك

وحأفضل أحبك وأعشقك .. وأفضل احبك وأعشقك

أنا بعشقك .. أنا بعشقك .. أنا بعشقك


-----------------------------------------

وهذا رداً آخر قوي جداً من إحدى المنتديات

أعجبنى نصه والتفاعل مع محتوى القصيدة

الشاعر ** بن عثمان

بعنوان (ليه تكرهي)

النص :


ليه تكرهي ؟ ليه تكرهي؟

ليه تكرهي ؟

ليه تكرهي القلب البنادي علي غريبا ماهو في؟

ليه تكرهي الوطن الجمع اشلاء غراما منتهي؟

ليه تكرهي القلب النبض بي حبو قلبك من سنين؟

ليه تفتحي الباب للدموع؟

ليه تزرعي الشوك في ارض كانت تضم الياسمين؟

شبهك قليل,,, ياشامخه زي قمم الجبال

ياحلوه زي زهر الربيع ،،،،،، ياساطعه زي شمس الضحى

يالوحه ضاجه حياه وشعور,,, ياحقيقه اروع من خيال

ياسامقه زي شجر النخيل

ليه تكرهي؟

مشكلتك الروح التفتش ديمه لي قلبا امين

لكن خساره بقي الامان حلما سراب مدسي مابين نور وطين

ليه تكرهي؟

كل الزهر حزنان عليك

حتي البحر لاقاني بي حزن السنين

فاضت دموعو عذاب وهم ,,,زعلان شديد معقوله انتي بتكرهي ؟

ماانتي جمعتي النجم اجمل عقود من الوفا

نورتي دربا بي شموع,,, قلبك وحاتك مابيعرف يوم جفا

بس اسمعي : الريده صبحت مستحيل

والعشقو من قدم السنين ياكان مصيرهم للجنون

او طعنه في جوه القلب جرحت فؤادم والحنين

ليه تكرهي؟

دمعك نشف من طول سهادك والنواح

نضمك كمل من شعرك المنسوج الم علي ماضي كان مليان جراح

شمعك طفا,,,نجمك افل ,,, نورك رحل

سجن الغرام مابشبهك

حتي الكره مابشبهك

ليه تكرهى؟

طردك مباح ,,, هجرك مباح

قفلك وراو باب الضلوع ,,, كان قلتي طفيت الشموع

كان قلتي خليت القصيد ,,, او قلتي من بعدو العشق حرمان اكيد

ليه تكرهي؟

كان اشتهاك شوق البلد للنسمه في عز الهجير

كان اشتهاك بسمة طفل بتبدد الليل الطويل

كان اشتهاك غنوة فرح بتودي للزمن الجميل

ليه تكرهي؟

كريات دماك ما اتلوثت بس زادت الحد في الغرام

عشقك جميل ,,, ماانتي علمتي الهيام

ليه تكرهي؟

زولك عرف انو القلب مفتاحو كلمه وكلمتين

خبط علي باب القلب وبدون اذن اتحكر العشق اللعين

غيمك شمس مليانه ضو,,, وشمسو من كتر الخداع دايما بتغرب مرتين

لازم جراحك تندمل ,,,لازم ضلامك يبقي ضو

لازم صحاريك تبقي نيل

ليه تكرهي؟

خيل ريدك اجتازت قصور ,,,دكت قلاع,,,دكت حصون

لكن اذا خيلك كبت ماتاسفي ,,,ماالكبوه من طبع الخيول

بس اوعي تلدغي مرتين

ليه تكرهي؟

لمن عشق قلبك سما,,,بقي طير يرفرف في السما

ليه تحبسي الطير في قفص مصنوع من الهم والانين

ليه تكرهي؟

ليه تحرمي القلم الكلام ؟

خليهو يكتب في الملام ,,,او مره يقريهو السلام

اوحتي يتزكر حنينك والهيام

بس ياملاك ماتكرهي

خلي الشمس تدخل تطل تطرد نسيج العنكبوت

خلي القمر يقعد حداك,,,خلي الحزن يرحل يفوت

ماتاسفي

لوكنتي في كونو القمر ,,ضوو انطفا

لوكنتي في دنياه غيم شمس الهجير حرقت دناو

لوكنتي في عز البرد نار اّنسك واوحشة الليل الطويل

علي زول وحيد ماليهو هم,, وفي ايدو قيد

ليه تكرهي؟

مسكين اذا ماقدرك,,,غبيان اذا ماقدرك

مابكفي لو شال الشمس واهداها ليك في يوم مطير

مابكفي لونسج الحروف بي رقه زي صوت الخرير

مابكفي لو شكرك الف,,,مابكفي لو صاد النجوم في كل ليل

مابكفي لو مسك السما ,,, اوحتي مسكك العبير

قلمك اسير في وقعة العشق المحال

شعرك جريح مابين حقيقه وبين خيال

وغناك اسير مابين مؤكد واحتمال

ليه تاسفي؟

ماتاسفي لو في عيونك شوقو بات لابد من يصبح صباح

ماتاسفي لوليلك المهموم وقف في بابو منتظر السماح

لابد من من فرحا يطل ويلبسك اجمل وشاح

لابد من زمنا يجي يسقيهو سم,,, يسقيك راح

لابد من حزنا يفتق في قليبو المات زمان كل الجراح

ليه تاسفي؟

ليه تكرهي؟

ماتندمي قدامك المشوار طويل

فيهو الكعب,,,فيهو العديل

فيهو الاجاج والسلسبيل

فيهو العشر,,,فيهو النخيل

ماتندمي لودمعك اتساقط مطر

او حلمك اتبدل شجن

او حبو من دنياك رحل

اوحتي فارقك السحاب خلاك في عز الهجير

لو طل ليلك بالعذاب قرب خلاص فجر الهنا

لو قلمك اتفجر الم ,,,اوحتي من دمعك اخد

اوحتي من دمك اخد,,,اوحتي من روحك اخد

قرب خلاص فرحك دنا

لو حتي طالت فرقتك كتلت معاني الريده فيك

روح خلاص زمن الانين ,,,ورجعتي لي زمن الغنا

ماتبكي ,,,يكفيكي الحداد,,,اتوضي بي موية الصبر

ماتبكي ,,,يكفيكي الحداد,,,قلبك كفاو اتملي فوق نار الجمر

ليه تكرهي؟

املي الصحاري ورود وحب ,,,ماتكرهي

رغم احتمالات العذاب ,,,ماتكرهي

رغم الحقايق المره في دنيا السراب,,,ماتكرهي

رغم الشنا ,,,رغم الكذب ,,رغم الضباب ,,,ماتكرهي

رغم الحنان الانفقد في دنيا مابتعرف إياب ,,,ماتكرهي

بالرغم من كل السؤالات البقت من غير جواب,,,ماتكرهي

بالرغم من انو العشق اصبح خراب ,,, ماتكرهي

بالرغم من صوتنا الصرخ يازول تعال,,,ارجع تعال ,,,

لاجانا زولنا ولاصدي,,, ماتكرهى

حالك عديل بس همو دابو الليله طال

علي كل حال ما تكرهي

----------------------------------------------

وهذا رد آخر من شاعر آخر للرد على القصيدة الضجة :-

...........


الكره صاح ما بيفي حل وكرهك بعبر عن خلل

جوه الدوخل يبقي صوت ممزوج من الهم والزعل

والانهزام من اغلي زول صح بيعدك من الامل

لكن هي كلمه بكرهك ما حقو تتقال يا عسل

ما حقو كلمه بكرهك تنسيك عشقك ورقتك

وتعيشي انتي مع صراع بين حبك انتي وبسمتك

ما الكره ما هو صفات جبيبه وماهو قلبا يعشقك

ما انتي قلتي انا بكرهك وكرهك بقالي مع المحك

خلاني تايه في ظلام كلماتك الما فيها ود

وصفتي حبنا بي خيوط العنكبوت ووصفتي نجمنا بالعدد

نعلتي ايام الوداد والحب مولع ومتقد

سبيتي كل لحظة عشق ونعلتي صح عشق الفؤاد

لوثتي بي انا بكرهك كل القلوب الدار تحب

لوثتي بي انا بكرهك كل الكلام الفي القلب

لوثتي بي انا بكرهك سمعت عشق قام وانتصب

لوثتي بي انا بكرهك كل الكان رحب

عيشتي قلبي في ظلام لوثتي قلبي انا بالحزن

قفلتي كل درب وراك خليتي درب الريده ظن

وكرهك عماكي وضللك وبعدنا عن جنت عدن

وبعدنا عن عشق الفؤاد واصبحنا اغراب في الوطن

وكل السبب انا بكرهك


---------------------------------

انا بعشقك

بفتح شبابيك قلبي ليك

ريدا وغرام بستنشقك

وبوقف حروف القول عليك

بدمي للكون برسمك

وانا بعشقك

انا بيك بكون عالم جميل

لافيهو اهة ولاندم

وانا فلبي بيك يا ست هواي

صالح جروحوا واستجم

يالفيني ساكن ومشتهيك

يا اقصي غايات العشم

مكتول هواك يا احلي زول

لو بالفصيح او بالعجم

وانا بعشقك

مين السواك اهداني ريد

جوة القليب نبضو اتزرع

ومين السواك داوي القليب

من كل اشكال الوجع

ناخب فؤادي اشر عليك

اداك نبضو واقترع

سطر حوف اسمك غنا

احرف غناك ليها اخترع

وانا بعشقك

ياماليه جواي باليقين

بيك الحياة ما اجملا

انابيك بتحدي السنين

يابت فريده ومذهله

عبيني يومات بالحنين

كان يوم اطول فيك العلا

وافيهو لي عهدي الامين

كان يوم اطول فيك العلا

وانا بعشقك

باختصار

انا بعشقك

بالليل نهار

انا بعشقك

عز الشتا او جو حار

رغم الالم والانكسار

انا بعشقك

رغم الاسي والانتظار

انا بعشقك

يابت بتدي الكون نضار

انا بعشقك


---------------------------------


انا بكرهك ردا لقصيدة نضال الحاج ( انا بكرهك)

هذة قصيدة كتبتها على عجل ردا لقصيدة انا بكرهك لنضال الحاج


انا بكرهك وانا ما بريدك

وما بسالمك وما براسلك فى بريدك

انا بكرهك يا حلوة زى كره العمى

كرها بيكره حتى ريدك

وبكرهك لامن خلاص قطعتو قيدك

ما تقولى لى كلمة بحبك انا ما الامير الكان هو سيدك

وانا بكرهك وما اظن ارجع ادور تانى ريدك

وانا ما اظن بعد الكرة اقدر افتش لى دريبك

ما سكتك قام فيها شوك انشاء اللة يبقالك نصيبك

انا بكــــــــــــــــــــــــــــــــــــــــــــرهك

مبروك عليك لو طل يوم واشوف جديدك

فى اليوم دا بس اقدر اسامحك (وما بريدك )

لانو فى جواى كرهك شايلو خايفو كمان يبيدك

من خوفى ليكى ابيت افكو خاتية فى القلب البريدك

وانا بكـــــــــــــــــــــــــــــــــرهك

=========================














عدل سابقا من قبل Admin في الأحد يونيو 24, 2012 5:44 am عدل 3 مرات
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://muhaiedseedebdaa3.sudanforums.net
Admin
Admin


عدد المساهمات : 412
تاريخ التسجيل : 13/02/2012
العمر : 29
الموقع : حاليا : مدينة بورتسودان (ثغر السودان الباسم)

مُساهمةموضوع: رد: الردود على قصيدة أنا بكرهك - رائعة نضال حسن   الأحد يونيو 03, 2012 6:12 am



تم أخذ الموضوع من منتدى الشعر السوداني

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://muhaiedseedebdaa3.sudanforums.net
 
الردود على قصيدة أنا بكرهك - رائعة نضال حسن
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:تستطيع الرد على المواضيع في هذا المنتدى
مهيد كاريكا للإبداع  :: منتدى الشعر والشعراء :: قسم روائع شعراء السودان-
إرسال موضوع جديد   إرسال مساهمة في موضوعانتقل الى: